Kaosnodeland

Personleg: Flytting

2009-12-27T13:52:00.002+01:00

For slekt og vener som av einkvan grunn ikkje les engelsk: Eg er i ferd med å flytte frå Nodeland til Møll, ei idyllisk lita jordbruks-grend nord om Mandal, i Holum prestegjeld. Lat insekt-vitsane flagre! Møllkuler bit ikkje på meg.

Eg har fått leige eit lite hus som ligg for seg sjølv men med kort gangveg til buss. Førebels er eg berre innom etter arbeid og tek med meg små ting som klede, gardiner, bøker og små datamaskiner, og reiser attende til Nodeland om kvelden. Men eingong i januar er det planen at eg skal flytte over.

Posten vil bli ettersendt i eit års tid, slik som sist eg flytte. Epost-adressa er uendra. Derimot vil fasttelefonen bli borte. Dette er eit så langt flytt at nummeret uansett ikkje ville vore det same. Dersom eg får fiberoptisk internett slik eg har tinga vil det ikkje vere bruk for telefon lenger. Eg har mobiltelefon, men brukar han berre nokre minutt i året.

(For dei som ikkje veit det så har eg ein gradvis framskridande tilstand med røystebanda slik at eg berre kan snakke ganske lite. Etter eit par hundre ord blir halsen sår og etter ei tid kan eg ikkje snakke meir. Lange telefonsamtalar er då uansett berre for dei som har mykje på hjarta og ikkje treng å høyre meir enn eit ja og ha no og då. Slike vener hadde eg ei tid, men av einkvan grunn har vi drive frå kvarandre. No vel, du ser at eg ikkje har tarv for to telefonar.)

Eg har hatt det fint her på Nodeland, men det ser greitt ut på Møll og. Huset er gamalt men pussa godt opp, særleg i første høgda. Der er jamvel ei heilt ny varmepumpe, sjølv om den går berre til luft og ikkje til vatn eller grunnvatn. Og for første gongen sidan eg flytte heimanfrå som 15-åring er eg omkransa av grøne bøar og elv i staden for hus og plenar. Det er ikkje mykje eg får sett av landskapet på denne tida av året, sjølsagt, men det blir vel vår denne gongen og, får vi vone.

Dersom du treng adressa eller kart til kvar eg bur, kan du kontakte meg. Eller du kan spørje kven som helst i Holum prestegjeld. Det ser ut til å vere ein av desse små stadene der alle kjenner alle. Berre ikkje eg, for eg er eit pinnsvin.

Norsk, engelsk, bokmål og ubuntu

2009-10-30T11:43:00.004+01:00

Dersom du les dette på ei datamaskin, så brukar du eit operativsystem. Microsoft Windows er det mest brukte, og er eit temmeleg godt eit. Men det er ikkje det einaste. Dersom du har ei maskin frå Apple så har den sitt eige system. Og dersom du er meg så brukar du Linux mykje av tida.

"Linux er betre enn virus" er mitt slagord. Fordi så mange amatørar brukar Windows så blir dei fleste virus og andre skumle program skrivne særskilt for Windows. Dei verkar ikkje på andre system. Dessverre er Apple sine maskiner endå dyrare enn dei som køyrer Windows. Men her er det at Ubuntu kjem inn. Ordet er afrikansk, som du sikkert kan høyre. Det er ein kar frå Sør-Afrika, Mark Shuttleworth, som har organisert og finansiert denne versjonen av Linux. Systemet er gratis og kan brukast til dei fleste vanlege oppgåver i heim og arbeid, slik som e-post, nettlesing, reknskap, chat, nettbank, spele musikk og film, og City of Heroes. (Ikkje at eg spelar CoH på jobben, sjølvsagt. Vanskeleg å drive brukarstøtte og samstundes bruke gammasynet mitt mot ovdigre robotar! Lunsjpausen treng eg til å skrive på nettet, ser du.)

Linux, og dermed Ubuntu, er å få på mange språk. Mellom dei er nynorsk. Denne omsetjinga er det friviljuge som gjer, og kvaliteten varierer. Ofte er somme meldingar omsett til nynorsk, andre er enno på engelsk, og nokre ganske få er på bokmål. For meg gjer dette ingen skilnad, men det kan hende det enno lever nokre få nynordmenn som har datamaskiner og ikkje skjønar engelsk. Sant om eg veit. Men det aller, aller meste er på Målet Hennar Mor. Kanhende eg skulle melde meg friviljug til å omsetje resten - det ser ut til at eg er ein av dei mest duglege brukarane av nynorsk som enno er i live, nest etter språkprofessorar og ein og annan forfattar. Det har sant og visst går utforbakke med målet vårt siste ættleden.

Du kan ha Ubuntu og Windows på same maskina, i fall du skulle trenge Windows for eitt eller anna av og til. (Sims 3, mest sannsynleg, sidan det ikkje verkar i Linux. Spelet brukar eit innfløkt kopivern, og Linux har ikkje støtte for slikt. Det er laga av folk som meinar at "informasjon ønskjer å vere fri".)

Les meir om gratis operativsystem på norsk:
Ubuntu Norge
Linux Norge

Dumskap frå NHO

2009-08-31T08:20:00.002+02:00

Ein skulle vente klokskap frå folk som har ansvar for hundretusenvis av arbeidsplassar. Men det syner seg at det er menneskeleg å vere dum, så lenge ein berre tenkjer snevert på seg og sitt.

No går ein talsmann for NHO ut og seier at det blir for lettvint at folk med svineinfluensa skal få sjukmelding over telefon. Det vil påføre samfunnet store kostnader, seier han. Men kva med alternativa?

Kanhende han vil at folk med grisesjuka skal kome på jobb og smitte alle der på ein gong, så dei må stenge dørene veka etterpå? Dersom smitta sprer seg mest gjennom skulen, slik det no ser ut til, vil den i alle fall kome til litt ulik tid til dei ulike arbeidarane, sidan ikkje alle har born i skule og førskule, og i det minste ikkje alle har born på same skulen. Dermed vil dei fleste arbeidsplassar vere i stand til å halde det gåande, om enn med færre tilsette.

Eller kanhende han vil at dei sjuke skal gå til lækjaren, og smitte heile venterommet som er fullt av dei som har minst å stå imot med. Kanhende samfunnet kan spare store summar på at dei kronisk sjuke døyr i fleng, men Gud fri oss frå slike innsparingar.

Kanhende arbeidsgjevarane er redde for at folk skal ringe etter sjukmelding når dei ikkje er sjuke. Og det kan vel finnast dei som er dumme nok til å prøve. Men her har vi ein sjukdom som ingen under 60 har motstand mot. Det vil sei at før eller sidan får du han. (Vaksina kjem for seint dersom vi held skulane opne, slik det no er lagt opp til.) Dersom du altså har teke dine grisedagar tidleg, har du eit problem når du faktisk blir sjuk.

Dette er ikkje ei sjette ferieveke, det er ein sjukdom som drep rundt 1 av 200. Kanhende noko mindre dersom vi klarar å seinke han slik at ikkje for mange blir sjuke om gongen (vi har ikkje sjukehusplass til alle på ein gong.) Ikkje ille for ein pandemi, men nok til at dei fleste har ein kjenning eller slektning som vil døy av han. Og same kor mykje pengar du har og kor høgt på strå du er, dei døde kan du enno ikkje vekkje opp.

Google bekymre deg den nyeste informasjone

2009-05-26T14:23:00.002+02:00

Overskrifta idag er henta frå Google Translate, som eg ga i oppdrag å omsetje ein japansk blogg. Det var ikkje mykje å bli klok av, sjøl om det gjekk an å gisse seg til litt av innhaldet. (Det trur eg ikkje du kunne klart utan omsetjing.)

Mellom nærtståande språk som engelsk og norsk, derimot, går det lettare. Det hjelper óg at slik omsetjing er meir vanleg, sidan Google Translate blir betre med bruk. Du kan nemlig rette på openlyse feil du ser.

Diverre er nynorsk ikkje enno på lista, men dei fleste nordmenn er utsette for bokmål dag etter dag så det klarar seg vel for no.

Dermed er det ingen grunn for meg til å skrive på norsk, utanom dei få ting som berre vedkjem nordmenn. Adressa til den originale (og beste) Kaosnoden i Googliansk omsetjing er her.

Ny ekteskapslov

2008-06-12T09:25:00.003+02:00

Dette går heilt feil veg. Staten skulle slutte å blande seg i folk sin sivilstand i det heile. Det er eit sakrament og høyrer inn under den religiøse sfære, ikkje den verdslege. Skulle skattelova ha ein paragraf om kven som kvalifiserer for nattverd? Eller arvelova ha sær-reglar for dei som har fått Den Siste Olje før dei sov inn? At staten skal ha noko med sakramenta å gjere er ein arv frå ei anna tid. No då staten ikkje ser seg sjølv som ein Guds tenar, må han heller ikkje forvalte sakrament. (Det skulle han no uansett aldri ha gjort.)

Å gje eller ta pengar basert på folk sitt kjønnsliv er tvilsamt nok i privat samanheng. For staten å gjere dette skulle sjølsagt vere tabu. Det blir ikkje magisk betre av å inkludere homofile. Det berre viser kor malplassert det heile er. Korleis kom dei før dei polygame i køa, forresten? Muslimar kan ha opp til fire koner. Ved å halde tre av desse utanfor, diskriminerar vi mot dei stakkars snille muslimane som aldri har gjort oss noko vondt...

Stopp dyneløftinga. Ekteskapet ut av statsbudsjettet.

Fritt Vestland!

2008-03-07T11:48:00.002+01:00

Professor Aarebrot åtvarar mot vestlandsk separatisme.

Kva er så gale med det? Folket på Vestlandet, i Nord-Noreg, på Island og Færøyane kom hit i yngre steinalder langs dei frisiske øyane ved Holland; vi er meir i slekt med nederlendarar og engelskmenn enn med austlendingane og trønderane, som kom austervegen saman med danskane og svenskane, opp gjennom Tyskland. At vi kom til å leve i same nasjon som desse reserve-svenskane er eit samantreff av diverse kongar sine hell og uhell på slagmarka og i senga. Vi er ikkje særleg nær i slekt, heller ikkje var språket vårt, til dess vi fekk tredd dansken ned over hovudet.

Ja til eit fritt Vestland! Nei til kolonialisme og utsuging! Røyst Vestlandspartiet!

Litt meir om internett-musikk

2008-01-17T10:22:00.000+01:00

Før i tida hadde eg ein CD-spelar og fleire høge stablar med CD-plater på kontoret. No har eg lese inn mine favoritt-plater på harddisken heime, og installert eit program som heiter "Winamp Remote". På den bærbare datamaskina har eg ein liten mottakar for ICE mobilt internett. Når eg ønskjer å høyre ein av favoritt-låtane mine, kan eg logge meg på ei vevside som kallar opp maskina mi heime og får henne til å spele av songen over Internett. Så alle CDar eg har lagt inn heime har eg óg med meg kvarhelst eg har Internett.

I tillegg lyttar eg på last.fm, ein "Internett radio" som spelar tilfeldige plater som den trur eg likar. Dersom eg høyrer ein song eg skikkeleg mislikar, kan eg trykke ein knapp så den aldri blir spela meir. Dersom eg berre ikkje vil høyre han no, kan eg spole forbi. Dersom det er ein song eg likar, kan eg sei frå om det og den vil kome på ein annan kanal som berre spelar favorittar. Det er ei nokså blanda forsamling, du kan høyre dei på http://www.last.fm/listen/user/Itlandm/loved .

Elles abonnerer eg på MSN si musikkteneste. Den har ikkje særleg mykje god musikk, men den som er kan du høyre så ofte du vil, ikkje i tilfeldig rekkefølgje som på Last.FM.

Endå ei datamaskin!

2008-01-11T15:14:00.000+01:00

Nei, det er ikkje etterfylgjaren til TERRA. Dette er ei bærbar maskin, og ho er ikkje eingong meint å kome i staden for den bærbare spelmaskina frå Dell som eg kjøpte i desember 2006. Dell-maskina blir framleis brukt i heimen, om lag ein gong i veka og stundom meir, til å spele City of Heroes, når "otaku trio" er aktive alle på ein gong.

NOZEXPLZ (mitt namn i nettverket) er den styggaste bærbare maskina eg kan minnast å ha sett sidan 80-talet, då bærbare maskiner var (som ein artikkel skildra dei) "omlag så tunge som ein sekretær og noko heitare". Denne er ikkje plagsamt tung, men nesten så brei som ein sekretær, om du måler dei delene av kvar som er nedpå fanget ditt. Men berre nesten, og i motsetnad til sekretærar har denne maskina eige tal-tastatur til høgre, som eit skikkeleg tastatur. Ikkje at det er mykje "skikkeleg" over dette tastaturet, som er i bleik plastikk-aktig plast. Dette til skilnad frå resten av maskina, som er i grå plastikk-aktig plast. Ikkje mykje hykleri der i garden! "No er det på tide å lage ei maskin som ikkje berre er billeg, men ser skikkeleg billeg ut" må LG kanhende ha tenkt. Og det lukkast dei med.

Trass i eit skranglete tastatur og billeg plast overalt, er LG E500 fullt på høgde med ei standard 10000 kroners maskin (eller 8000 på postordre). 2 GB minne gjer at Vista glir så fint som ei and i dammen, jamt og staseleg. Ein Intel Core2 Duo tokjerne-prosessor gjer det arbeidet som gjerast skal. Jamvel grafikk-kortet, NVIDIA GeForce 8400M G, er meir enn eg treng sidan dette ikkje er ei spelmaskin. Det er eit stereoanlegg med e-post og internett. Eller det er kva eg brukar henne til.

Å ja, prisen. 7700 kroner ga eg på Expert, men dei var nesten utselde... endå om seljaren gjorde kva han kunne for å få meg til å kjøpe ei 10000 kroners maskin med omlag same eigenskapane men smexy layout og svart metall-liknande plast.

Kjøpt ny PC

2007-11-15T19:04:00.000+01:00

Etter at Monster (PC'en eg kjøpte for Oblivion våren 06) mista vifta endå ein gong, har eg investert i ein Multicom "Din Side PC" med firekjerners prosessor. Eg har alt tre skjermar, så eg kutta ut skjerm og tinga meir minne og slikt. Det nye datadyret har fått namnet TERRA fordi ho har ein terabyte (1000 gigabyte) med harddisk. Ho har óg 4GB med internminne, sjøl om ho ikkje kan bruke meir enn 3,25 under 32-bits Windows.

Her er eit bilete av Terra før eg kopla til all kabel-spaghettien. Fin, ikkje sant?

November

2007-11-02T00:44:00.000+01:00

Igår rotfylte eg ei tann. Idag har eg hovudverk og er stiv og støl. Huda på leggene flassar av. Både vindfanget og badet stinkar av katteskit, endå eg ikkje har katt. På jobb er det kaos og panikk over flytting som kan kome kva dag som helst, og eg har fire veker ferie som eg ikkje ser korleis eg skal få teke - eg må vere glad til om eg kan unngå (ubetalt) overtid.

Men eg har skrive 3700 ord på romanen min, så alt i alt har det vore ein god dag. ^_^

November har fått nytt namn: NaNoWriMo.

Alt med måte og særleg trening

2007-09-29T10:28:00.000+02:00

Eg har ein teori om at det står tusenvis av trimsyklar rundt om som mannfolk har kasta seg på og så gjeve opp etter nokre dagar, stive og støle og sure. Det er slik at når ein, som eg, ikkje har sykla sidan ungdomen, så treng kroppen tid til å venje seg. Difor har eg berre sykla ti minutt annakvar dag. Kanhende eg kunne sykla litt meir utan å få vondt nokon stad, kven veit. Men det har lite for seg. Poenget no første veka var å overtyde kroppen om at desse uvanlege rørslene er komne for å bli. Det første som då hender er at kroppen legg ut nye små blodårar i dei musklane som blir meir brukte. Det ser ut som dette er gjort: Sist natt var pulsen min lågare med same motstanden som eg hadde brukt første to gongene. Berre heilt på slutten av dei ti minutta gjekk pulsen opp.

Eg syklar framleis med låg motstand, 3 av 8. Musklane må få tid til å vekse seg til, og ikkje minst sener og ledd. Dette tek nok litt lenger tid, så det blir ikkje noko styrketrening på lenge enno. Men neste veke, om ikkje noko kjem på, tenkjer eg å anten auke lengda eller sykle kvar dag.

Men ikkje i dag! I dag vil eg ikkje gjere det slag. Eg kjenner litt i armane, mest den høgre. Berre ganske lite, men eg veit ikkje om det kjem frå syklinga eller av di eg bar nokre kassar på jobben i går. Litt synd, for i dag regnar det, og det er heller kaldt i stova. Nett slik ein dag var det eg tenkte på då eg kjøpte sykkelen: Å kunne varme opp stova med kjøtkraft. (Og om ikkje sjølve rommet vert så mykje varmare, så vert i det minste eg det.)

Ergometersykkel!

2007-09-24T21:22:00.000+02:00

Idag fekk eg min første ergometersykkel! Han kom i ei nokså flat (og tung) pakke, og eg brukte omlag 500 kilokaloriar berre medan eg skrudde han ihop. ^_^

Eg har gått og kikka litt etter trimsykkel ei stund, og nett då eg skulle til å kjøpe ein annan, fekk eg det for meg å vandre ein annan veg og såg ein Intersport-butikk der eg stakk innom. Dei hadde kampanje (har enno om ikkje dei er utselde) der eg fekk kjøpt ein Nordic 300 Tour Edition for 1499 kroner. Det ordna seg for dei snille denne gongen! Ein på jobben var så hjartegod å køyre pakken heim for meg endå han hadde det travelt sjølv. Deretter plundra eg ei stund med å skru han saman, og klarte det til slutt. Vel, det er to deler eg ikkje skjønar kvar høyrer saman, men dei er berre plastdeksel. Den virkar purrfekt.

Sidan eg ikkje har sykla på år og dag, "sykla" eg berre i ti minutt, og i roleg tempo, ein puls på 110-120, om lag som når eg går litt fortare enn eg ville gjort av meg sjølv. Eg kan kjenne at eg brukte heilt andre muskelgrupper på heilt andre måtar enn når eg går. Skulle ikkje undre meg om eg er litt støl imorgon. Eg har tenkt å halde fram å trimsykle 10 minutt eitpar gonger i veka til kroppen har akseptert og byrja bygge opp dei musklane eg brukar til sykling. Først då kan eg få fullt utbyte av han. Planen er å varme opp stova med trimsykkel-energi om vinteren!

Dette er ein sykkel med magnetisk motstand, og ein køyrecomputer med mange funksjonar og nesten ingen dokumentasjon.

Hydro-millionærar er ikkje som andre millionærar

2007-08-06T11:24:00.000+02:00

-Dei er heilt framande for den tanken at dei kan ha hatt litt flaks (f.eks. fordi den kinesiske økonomien veks med 10% i året og har bruk for nettopp deira produkt). Nei, det er alt fordi dei er kvalitativt betre enn andre menneske. Dei har rett og slett fortent alt saman og meir til.

Sommarbrev

2007-07-29T14:58:00.000+02:00

Eg lever enno, og har så vidt eg veit ingen alvorlege problem. Gjev det vore så vel med landet vårt. Kvarhelst eg ser er folk rusa på pengar. Aldri har det vore så mykje pengar i hendene på vanlege folk, og aldri har folk vore så ville og gale etter pengar heller. Det er knapt nokon som tek seg tid til å stogge opp og setje pris på det dei har. Så når dei sju feite åra er omme, har folk ikkje berre brukt opp pengane og lånt endå mykje meir, dei har óg hovudet fullt av planar som er så levande for dei at dei berre må ha dette og hitt.

Eg fekk att den store svarte datamaskina mi frå reparasjon sist månad. Eg har tenkt på om eg skulle kjøpe ei ny til hausten (når neste tilleggspakke til Sims 2 kjem ut) men sant å sei er denne meir enn god nok. Det kan vere greitt å ha litt pengar til overs når eg må flytte til vinters. (Vel, anten flytte eller byte jobb. Det er ikkje heilt avklåra enno. Ser ut som arbeidsplassen min vart teken på senga i dette stykket.)

Denne sommaren har ikkje vore så tropisk her på Sørlandet som den i fjor, og glad er eg for det. Eg gler meg for kvar regnværsdag, då blir eg ikkje kokt i huset med dei store vindauga. (Sjøl med markiser og persienner er det eit drivhus.) Eg har dessutan ingen ferie om sommaren. Arbeidsplassen min har særs god kjøling (kaldt vatn sirkulerer i taket) så det blir aldri for heitt eller for kaldt. Og vindauga vender innover mot gardsplassen heller enn ut i solsteiken. Den beste staden å vere på ein sommardag!

Mi indre klokke...

2007-05-24T22:35:00.000+02:00

Mi indre klokke saktnar nesten ein time i døgnet. Eller med andre ord, døgnet mitt er på nær 25 timar. Eller med andre ord, utan vekkjarklokke vil eg vakne omlag ein time seinare kvar dag. Men no har eg vekkjarklokke, fordi eg har jobb. Hos folk flest vil dagslyset og den tida dei faktisk er aktive justere den indre klokka, dersom dei ikkje lever i ei hole. Eg lever ikkje i ei hole; eg går på jobb fem dagar i veka og går vanlegvis tur dei to andre. Men den indre klokka mi lever sitt eige liv. Kanhende eg er ein mutant?

Uansett, denne veka er ei av dei då mi indre klokke seier "natt" når den ytre klokka seier "arbeidstid". Det er ikkje komfortabelt. Mesteparten av natta er eg lys vaken, men det er ikkje ei god tid å klippe plenen på...

Men etter nokre dagar rullar døgnet rundt att og eg kan sove heile kvelden og betale ned på sømn-gjelda mi ei tid.

Datamaskiner

2007-05-14T02:05:00.000+02:00

Monster-maskina heime krasja for eitpar veker sidan. Den kunne ikkje starte opp i det heile. Eg har tenkt å ta ho til byen for reparasjon, men det har ikkje blitt til noko enno. I staden har eg kopla den bærbare Dell maskina til skjermen, tastaturet og ekstern harddisk, og den gjer for det meste same tena. Det er ganske imponerande, og viser kor stort framsteg dobbeltkjerne-prosessoren er. (Du får ikkje like skarpe bilete likevel, særleg tydeleg i spel.)

På den andre sida er det ikkje lenger enn slutten av desember at monsteret var inne til reparasjon hos North Corporation. Dette er ikkje god reklame for dei. Og fordi maskina er så tung (og bussane går der dei går) må eg ta drosje for å få den reparert. Det må reknast med i kostnaden når ein samanliknar med maskiner som ikkje går sund med nokre månaders mellomrom. Til dømes Fujitsu Siemens maskinene har som regel mista noko av funksjonen ganske tidleg (diskettstasjon som ikkje virka på den eine, CD på to andre) men dei har aldri brote heilt saman, slett ikkje innan garanti-tida. Vel, unnateke då lynet slo ned og slo ut den eine av dei! Og det tok eitpar månader å få den reparert. Dei rota den rett og slett vekk. Det var Expert, og dei har rota vekk andre ting for meg sidan. Men det kjem alltid til rette før eller sidan, berre at eg først må mase på dei.

Det får klare seg for i natt. Arbeid i morgon! Men snart 17.mai. Hipp hipp. ^_^

Ubuntu Linux 7.04

2007-04-25T17:16:00.000+02:00

Dette er eit steg framover for Ubuntu. Dette gratis operativsystemet (ein variant av Linux) er eit alternativ til Windows. Det er raskare, men har mindre støtte frå leverandørar av tilleggsutstyr. Til dømes kan eg ikkje oppdatere lomme-PCen min frå ein PC som køyrer Ubuntu, heller ikkje kan eg bruke stereoen min som lydkort slik eg kan under Windows. Men du kan sjå film, lytte til musikk, surfe, lese og skrive. Grunnen til at eg køyrer det på denne maskina nett no er at eg sit med ein treg bærbar, og det går fortare å skrive under Linux. I Google sin teksthandsamar gjekk det stundom så tregt at eg låg fleire ord framfor maskina. Det gjer eg ikkje no. Noko å tenkje på dersom du har gamle maskiner du ikkje har lyst å kaste?

Olyckliga gatan

2007-03-30T09:57:00.000+02:00

På veg til arbeidet høyrde eg att den gamle slageren "Lyckliga gatan", som eg hugsa frå då eg var liten men aldri har tenkt over på vaksent vis. Det var sjokkerande. Det er jo ein einaste sosialistisk, demonisk mardraum. Trass i tittelen og den vakre musikken, kva føremål kan denne teksten ha, utan det å gjere lyttaren bitter og hatefull? Denne songen er eit klassisk døme på sjølve det svarte holet i sentrum av sosialismen, nemlig motviljen mot å la andre gjere sine eigne frie val dersom dei ikkje meinar det same som eg. Dei som raserte den "lukkelege gata" og bygde høghus i staden, og dei som flytte inn i husa, trur du dei gjorde det med bajonettar i ryggen? I eit kommunistisk land kanhende, men ikkje eingong i Sverige, langt mindre Norge. Dei alle valde å gjere det dei tykte var best for dei. Dei koselege gamle husa vart rivne fordi eigarane selde dei med stor forteneste til dei nye utbyggjarane. Alle gjorde det dei tykte var best for dei sjøl. Av dette er det noko å lære, men ikkje av songen. Den er eit sørgjeleg døme på kva som hender når folk blir gamle utan å vekse opp.

Tenk det, Gjedrem

2007-02-17T13:03:00.000+01:00

Folk er slutta å spare, eller rettare sagt, i gjennomsnitt låner dei meir enn dei sparer. Merkelege greier, når rentene har ligge berre så vidt over null i årevis. Og prisane på hus går berre opp og opp, vel over det dei er verd dersom du berre skal bu i dei eller leige dei ut. Merkelege greier det, når bankane kastar millionar etter folk.

Men no når sentralbanksjefen har fortalt oss alle at bustad-prisane er for høge og at vi må slutte å låne, så vil folk klokeleg ta det til hjarta. For folk er ikkje dumme, eller grådige, eller styrde av kjensler, eller opptekne av å syne seg minst like bra som naboen. Dei er "rasjonelle aktørar" som det heiter i økonomi-språket. Ja, i alle fall er dei det i teorien. I modellane i datamaskinene til Norges Bank, Finansdepartementet og Statistisk Sentralbyrå, der er vi alle rasjonelle aktørar. Men sant om eg kan sei eg har møtt nokon slike sjølv. Alt eg ser er menneske.

I desse influensa-tider

2007-02-17T11:29:00.000+01:00

Kanhende eg skulle ete kvitlauk. Det er kanskje godt for immunforsvaret, men i alle fall kan du vere trygg på at det reduserer smittefåren. Ingen vil kome nær nok til å smitte deg. (Anten dei er vampyrar eller ikkje...)

"Tenn lys"

2006-12-31T09:09:00.000+01:00

Vakna i dag av klokkeradioen som spela songen "Tenn lys", av Eyvind Skeie. Eg måtte rettnok Google litt for å finne songen på nettet, men når først eg hadde namn og tittel var det lett å finne songen på MSN Musikk. (Merkeleg nok... dei er litt variable i utvalet der borte, men denne hadde dei.) Fann ei vakker side med teksten óg. Som de ser er denne songen ei spanande blanding av sosialisme og kristendom. (Eller kanskje ikkje alle ser det. Eg hadde sikkert ikkje forstått mykje av det for nokre år sidan, då eg hadde langt færre verkty for tanken enn idag. ) Uansett, dette er to ting som ikkje er lette å blande, endå dei begge er ein del av den norske folkesjela. Sosialismen går jo elles ut på å byggje vår eigen himmel utan gudar og kongar.

Kanhende sosialismen er tenårings-trassalderen i vår kultur. Men heldigvis er ikkje tenåringar berre trasige heile tida.

Eitt år eldre

2006-12-28T12:47:00.000+01:00

Ikkje noko sex dette året heller. Og som ei verdig avslutning eksploderte den beste PC'en min i natt, 9 månader gamal. Jaaa! God unnskyldning for å kjøpe ein ny. No med dobbeltkjerneprosessor. Eg har lenge hatt lyst til å gå innom ein databutikk og spørje om dei har "ei maskin med dobbelthjerneprofessor".

Til alle som ikkje gratulerte meg med årmålsdagen i går: Takk i like måte! ^_^

Framleis i live

2006-12-21T11:21:00.000+01:00

og ikkje berre det, eg fann ein gratiskode til å spele Guild Wars Nightfall, eit online rollespel som er vakkert og der du kan spele åleine om du vil. Gratiskoden er rettnok berre for ti timar over fjorten dagar, men dei fleste ting eg gjer varer ikkje meir enn fjorten dagar likevel. Eg er som ein somarfugl... berre feitare og utan vengjer ... vent, vil det sei at eg er som ein kålmakk? Uansett, slik er det!

God jul til alle som er barnslege nok til å feire denne oppdikta høgtida! ^_^

Tankekors

2006-11-17T11:19:00.000+01:00

Utan mangfoldige millionar i opsjons-gåvepakke hadde Telenor-sjef Baksaas ikkje gjort så god ein jobb, fortel han til Dagens Næringsliv.

Men kanhende nokre tusen Telenor-tilsette hadde jobba betre?

Kunnskap er makt (og pengar)

2006-11-09T12:09:00.000+01:00

Dersom styresmaktene på alvor vil ha økonomisk vekst her i landet, bør dei snarast opprette eit gratis internett-universitet der alle kan studere så mykje dei vil. På norsk, sjølsagt, så ikkje utlendingane kan ri på vår hest.

Eg treng vel ikkje nemne at breiband til alle er ein menneskerett i eit sivilisert samfunn i våre dagar.

(Ja, eg skriv dette dillet i lunsjpausen. Kor trist er ikkje det?)

Dagens Næringsliv og uføretrygd

2006-11-09T08:32:00.000+01:00

Dagens Næringsliv har siste veka eller så hatt ein serie artiklar, godt synlege på framsida, der dei ser på bruken av uførepensjon. Dei startar med den store mengda pakistanske framandarbeidarar som går på trygd. Dette er ei god sak å starte med, fordi du straks har dei norske lesarane på di side. "Ja! Slik må det vere! Dei kjem hit og tek uføretrygdene våre!" Etter at bladet har fått fram dette, går dei vidare til barnefamiliar, utkantkommunar og smittsam uføretrygd. Eit kjernepunkt som kom fram er at uføretrygda får store barnetillegg og andre goder som ikkje har noko med sjukdomen å gjere, som garantert bustøtte. Sjøl om dei hadde tent litt meir på å jobbe, ville dei gått glipp av desse tillegga (og betalt meir skatt) så dei ville tapt grundig på arbeidet. Det er ikkje vanskeleg å skjøne kva DN vil oppnå med denne saka. Dei vil sjølsagt at mindre pengar skal gå til dei sjuke og meir til direktørane og styreleiarane. For det er jo slik at dersom norske toppsjefar skulle tene berre ti gonger så mykje som arbeidarane, i staden for hundre gonger så mykje, så ville dei reise utanlands og bli sjefar der i staden, og kva skulle vi då gjort, med alle verksemdene utan toppsjef? Det er ein god ting med DN, vi veit kvar vi har dei. Men det spanande er det alternativet som ikkje blir nemnt, sikkert ikkje eingong tenkt på: At staten kanskje kan spare store pengesummar og løyse presserande samfunnsoppgåver ved å gje barnetillegg til lågtlønte på same nivå som ei tilsvarande uføretrygd ville gitt.

NaNoWriMo

2006-11-06T12:42:00.000+01:00

Ifall nokon skulle vere i tvil: Eg er atter ein gong med på NaNoWriMo, den (inter)nasjonale roman-skrivings-månaden. I år skriv eg (som vanleg på engelsk) ein romantisk komedie om ein ung mann som går på distriktshøgskulen, ei jente i siste klasse på vidaregåande, ein katt som av og til blir til ein gut, ei kvinneleg badevakt, ei bestemor med Alzheimer's, foreldre som aldri er heime, og den egyptiske gudinna Bast. Eg kunne vel like gjerne ha skrive på norsk, sidan det sikkert ikkje blir nokon som les i alle fall, men eg kan ikkje diktere til maskina mi på norsk og få det skrive ned. Det kan eg på engelsk. Så engelsk er og blir mitt nye hovudmål. Så lite skal det til.

Heilt greitt det, Klungland...

2006-11-02T14:27:00.000+01:00

Stortingsrepresentanten Klungland frå AP vil at AFP (avtalefesta pensjon) skal vere reservert for dei fagorganiserte.

Det er heilt greitt det, Klungland. Men sidan staten legg ut mesteparten av utgiftene, må dei uorganiserte få eit tilsvarande frådrag i skatten. Er det greitt for deg?

Det er trass alt dei fagorganiserte som har kjempa fram denne ordninga, seier Klungland og venene hans. Jaha? Eg trudde det var eit stortingsvedtak eller to. Men dersom du kan kjempe fram eit AFP som ikkje kostart skattebetalarane noko, så for all del. Det vil gjere oss uorganiserte langt meir ettertrakta på arbeidsmarknaden.

Dyrare dyreliv...

2006-10-19T19:43:00.000+02:00

Sims 2 Dyrelive, meir nøyaktig. Den nyaste tilleggspakken til Sims 2, dataspelet over alle dataspel for gutar og jenter, kvenner og menn, gamle damer med katt og gamle menn med hatt. Den fjerde tilleggspakken kostar (som dei andre) 299 kroner på Elkjøp (bortsett får at der er tomt no) og Gamezone, men 399 hos Spaceworld. Kor lite kuult er det?

Kanhende eg skulle døype dette om til "helseblogg"?

2006-10-16T19:38:00.000+02:00

Var til doktoren idag att, på grunn av mageverk og svart avføring. (Denne kombinasjonen kan vere eit teikn på blødande magesår, stygg sak. Ein ven av meg har ein far som held på å døy av kreft som dei oppdaga på denne måten ... lenge etter at dei kunne ha gjort det.)

Ein 5-minutts test viste at det ikkje var spor av blod i avføringa, berre blåbær. ^_^; mageverken kom nok av noko anna, truleg eit virus. Vel, det var verd 150 kroner å sjekke, ikkje sant?

Du ser, dette er grunnen til at eg vanlegvis ikkje går til lækjaren. Dei tek på meg på rare stader og let MEG betale for det, og fortel meg at eg er minst like frisk som dei, trass min livsstil. Eg meinar, ingen sex, ingen husdyr, ingen familie, berre ein virtuell vennekrins, nesten ingen alkohol (ja, det er sunt i år, med måte), ingen gulrøter -- faktisk ein diett av nesten berre melk og karbohydrat -- og berre måteleg mosjon, og ein jobb eg ikkje eingong kan snakke høgt om, langt mindre skrive om i dagboka mi. Dessutan søv eg til rare tider av døgnet og i varierande grad. Korleis eg enno kan vere i live er ei gåte for framtidas vitskapsmenn å finne ut av, men eg likar det.

Meir helsenavlesjåing

2006-09-16T13:30:00.000+02:00

Tidlegare i veka hadde eg vondt i venstre sida av brystet og i venstre armen, så folk sa til meg at eg burde gå til doktor. Det gjorde eg då etter eit par dagar, sjølv om eg er ganske sikker på at det ikkje er eit problem med hjarta. Folk i min familie er immune mot slikt, etter kva eg kan hugse. Då eg vaks opp var det vanleg å ha ei skål med smelta fleskefeitt på middagsbordet, og slik har det heilt sikkert vore sidan folk fekk råd til det. Det faktum at mine forfedre levde lenge nok til å formeire seg (for ikkje å nemne at dei vart 80-90 år og døydde av heilt andre ting) seier at vi må vere mutantar, immune mot hjarteinfarkt.

Lækjaren trur då óg at det er meir sannsynleg at det er magesår, men eg skulle ringje dersom det kjem att. Eg har ikkje hatt noko vondt når eg går opp trapper, som eg gjer kvar arbeidsdag. Men for godt mål kom eg att neste føremiddag og tok noko slikt som fem blodprøver. No skal det for alvor bli openberra kva eg har av kolesterol og triglyseridar, vil eg håpe.

Ut og gå

2006-08-31T21:10:00.000+02:00

I det siste har eg følt meg litt skral og slapp, så det var med undring eg såg på pulsklokka mi at pulsen er nede att på det låge nivået, eller nesten. Så eg hadde ikkje mykje val, eg måtte ta ein lang, rask gåtur att. Kan ikkje la kroppen tru at eg har gløymt han. Elles har eg halde fram med å leggje på meg til no nyleg, men det ser ut til at det har stogga for ei stund.

Det er slik eg gjer det når eg er i tvil om eller kor langt eg skal gå: Eg tek på pulsklokka og ser. Dersom pulsen er høg, held eg meg heller inne. Er han låg, tek eg ein lenger tur. Midt imellom, ein kortare tur.

Elles har eg fått Dragon NaturallySpeaking 9, som visstnok skal vere betre til å ta diktat enn 8, men det er berre den engelske versjonen eg har, så eg har ikkje nytte av den her. Kjøpte meg eit gummi-egg til å trene handa med, idag. Eg er litt stivare i armen og handleden enn før i sommar. Dette er sikkert fordi eg skriv meir i arbeidstida. Det er eit anti-mirakel til å øydeleggje handleden. Mykje verre enn å skrive heime. Fleirfoldige gonger verre.

Lenge sidan sist!

2006-08-17T22:34:00.000+02:00

Så lenge, faktisk, at eg hadde vanskar med å logge inn. Det er likt til at Blogger er i ferd med å byte til ein ny versjon, som er betre integrert med Google, den nye eigaren. Dei prøvde først å logge meg på den nye "beta" Blogger, men fekk ikkje det til. Det er ikkje alle som kan skifte til den nye enno.

Nok om det. Hetebølgja er endeleg over for ei vekes tid sidan, etter å ha vart mest heile sommaren (med eitpar regndagar innimellom). Eg er glad det er slutt på heten. Eg er ikkje noko trope-menneske, det skal vere visst. Eg trivest best i skodde og overskya. Litt regn plagar meg heller ikkje, men sol og sterk hete tåler eg dårleg. No kan eg gå turar att.

I det siste er eg byrja ete salat. Ikkje dei grøne blada du gjev til kaninane, men blanda grønsaker og slikt. Eg går i salat-disken på Mega. Det er dyrare enn yogurt, men det kjennest godt å bruke tennene innimellom. Og så smakar det godt. Så godt at det er godt å vere svolten! Ikkje at eg blir skikkeleg svolten att på lenge etter å ha ete den. Så dei dagane eg skal ete middag når eg kjem heim, let eg vere å ete salat til lunch.

Elles er det vel ikkje så mykje nytt å melde på norsk. Eg har etablert meg på zaadz.com, men det er heilt og fullt engelsk. Det er ein nettstad for dei som ønskjer å forandre verda til det betre. Litt vagt, det, og det same er somme av folka der. Elles greitt nok.

Då krampa tok meg

2006-07-21T22:28:00.000+02:00

Igår vakna eg som vanleg, men nett som ei veke før fekk eg krampe i leggen før eg rakk å røre meg. Bortsett frå at denne gongen var det høgre leggen. Eg trur aldri eg har hatt dei så tett etter kvarandre før, vanlegvis er det omlag ein gong i året.

Vel, det er ei plage, for eg kan ikkje gå på foten på nokre timar. Brukte å vere eitpar dagar, men etter eg byrja ta dispril like etterpå har dette gått kraftig ned. Dispril (eller andre medisinar med acetylsalisylsyre) hindrar musklar frå å stivne etter trening, så det er berre naturleg at dei hjelper her òg.

Men då eg kom til kjøkkenet, byrja eg kjenne meg svimmel eller heller uklår. (Det var ikkje som om rommet gynga eller sveiv rundt, det berre verka mindre verkeleg enn det skulle, og eg kunne ikkje stole på min eigen balanse lenger.) Ei slags elektrisk skodde byrja tetne rundt meg. Eg har vore ute for det nokre gonger før. Det er aldri eit godt teikn. Eg måtte setje meg ned. Eg var tørst, og eg trur eg drakk litt vatn frå springen, men så kjende eg meg litt kvalm og sette kursen for badet. Skodda vart tettare, og dei andre sansane mine vart også borte. Eg kunne enno tenkje, men ikkje særleg klårt. Eg tenkte på kven eg skulle ringe til for hjelp. Men på denne tida var nok allereie for mykje skodde til å sjå nummera på telefonen.

Medan eg halvt sat, halvt låg i døra mellom badet og gangen der telefonen sto, såg eg noko uvanleg. No var nesten alle andre sanseinntrykk borte, men eg såg noko som ein tjukk lysande ring. Eg såg han ikkje klårt, men då eg let att auga såg eg han så klårt som om han var på ein skjerm framfor meg. Det var som ein stor feit O framfor meg, men han var skapt av lysande prikkar eller kanskje firkantar, omlag som om du ser på ein gamal dataskjerm med ei lupe. Han var ikkje perfekt rund heller, det var ekstra prikkar oppe, nede, til høgre og til venstre, som ei aning av fire blokker som var nesten heilt tekne opp i ringen. Eg såg alt dette klårt og lurte på kva det var. Eg hugsa at eg for eitpar år sidan hadde sett ein liknande ring under eit liknande anfall, men den var laga av nåler heller enn prikkar. Denne var klårare. Men medan eg såg på han, kom gradvis ei kvit lysande skodde og viska vekk synet. Eg opna auga og let dei att på nytt, og biletet kom att. Men no kjende eg at eg kunne tenkjer klårare, og sansane mine byrja kome att. Då ringen bleikna no, vart han borte for godt.

På grunn av det merkelege synet ringde eg Søgne Legesenter straks dei opna. Fastlækjaren min er på ferie, men då eg forklarte at eg var redd det kunne vere eit slag eller drypp, sa dei at ein annan lækjar ville ringe attende. Det gjorde ho knapt tre timar seinare. Ho spurde meg ut og sa at dette var eit klassisk døme på dramatisk fall i blodtrykket, og hadde ikkje noko årsak i hjernen. Slike lysfenomen var "klassiske" sa ho, men eg har aldri høyrt om nokon som har hatt dei. Heller ikkje lærde vi om dette på skulen. Kven veit kor mange "New Age" sekter som har kome til på grunn av visjonar som denne... særleg dersom dei ser andre og meir spanande mønster enn ein tjukk flat gul ring av prikkar.

Au, au...

2006-07-13T16:57:00.000+02:00

Vakna klokka sju av krampe i venstre leggen. Det gjorde vondt og det stogga ikkje før musklane var heilt utbrende. Dette hender ein gong i året eller så i gjennomsnitt, men somme tider går det eitpar år og somme tider berre veker. Det er mest den venstre, men ikkje kvar gong. Eg sto opp så fort eg kunne etterpå og tok ein halv dispril. Dette må til for at ikkje muskelen skal stivne etterpå og vere stiv i 3 dagar. Eg prøvde òg å massere og halde meg i rørsle den første tida til acetylsalisylsyra byrja virke.

Det var ikkje nokon god dag for dette å hende på. For det eine er dei andre driftsfolka på ferie. For det andre hadde eg ein avtale med doktoren om å ta stinga. Det var litt tidleg for det. Det skulle vore i morgon, og sjølv det var tidleg (9 dagar) men doktoren skulle på ferie etter det. Vel, no skal han vere borte i morgon òg, så det vart i dag. Eg klarte å kome meg dit. Eg gjekk sakte, men det gjorde mindre vondt enn eg hadde venta å trø på foten. Til vår undring var såret grodd. Den einaste staden som klødde og var rødt, var der enden av tråden gjekk ut gjennom skinn som ikkje hadde blødd. Vonleg vil dette gro òg, no når der ikkje lenger er suturtråd i.

Elles legg eg stadig på meg, sjølv om det enno er mange månader att til eg er attende på den vekta eg hadde før eg slutta ete feitt. (Eller rettare, byrja ete svært lite feitt, som eg ikkje lenger kan fordøye normalt av einkvan grunn.) Kroppen er ein svært så tilpasningsdyktig krabat. Enno så lenge!

Eldbordsdag

2006-07-03T19:00:00.000+02:00

Det er ein grunn til at "eldbordsdag" ikkje er eit ord på norsk, sjøl om det grammatisk er fullt meiningsbærande. Her i landet set vi ikkje regelmessig fyr på borda våre. Dette er ein vakker del av norsk kultur, som vi skulle dele med våre nye landsmenn. *

På veg heim frå jobb kom eg forbi ein mann som prøvde å sløkkje eit brennande hagebord med eit kledeplagg. Men bordet brann allereie for godt til det. (Heldigvis var det i reint tre, utan måling eller lakk, men det hadde tydlegvis brunne ei lita stund.) Han henta ein liter vatn i ei brusflaske og sløkkte med det. Han hadde kome forbi og lagt merke til at nokon hadde gått frå ein eingongs-grill på bordet utan å sløkkje. Denne hadde etter kvart vorte så varm at treet tok fyr. Men då var dei grillande folka gått sin veg, og det var opp til tilfeldige forbipasserande å ta hand om elden.

Folka som bur i huset er fjernkulturelle. Det kan sjølvsagt tenkjast at andre har grilla i deira hage, men det er lite truleg, siden det heller ikkje er ein del av norsk kultur.

(* Eg heldt rettnok på å setje fyr på komfyren for nokre år sidan, då eg slo på feil kokeplate. Men det er annleis. Vi er ikkje som dei.)

Når Simmane døyr, kjem dei til Simmelen då?

2006-06-30T20:17:00.000+02:00

Det er fredag, og godt er det. Hosten har gradvis betra seg utover veka, og eg er no nesten heilt som før. Har óg kjøpt ein manuell grasklyppar og køyrt han ei testrunde på den høgste innstillinga (lengst mogleg gras, 42 millimeter). Eg likar mosjon som er meiningsfull... om det å slå gras kan reknast som meiningsfullt når ikkje der er dyr til å ete det. Dessutan fekk eg aldri start på den motoriserte som sto her då eg kom. ^_^*

Dette huset har ganske så mykje plen.

Suicidokrati?

2006-06-21T11:02:00.000+02:00

Eit medlem af støttegruppa for dei sveltestreikande afghanarane seier til Tv2 Nettavisen at "Det hadde vært grusomt hvis liv hadde gått tapt. Da hadde jeg blitt flau over å være norsk."
http://www.nettavisen.no/innenriks/article664674.ece

Det er allereie flautt at du er norsk.

Dersom Noreg skal styrast av sjølvmord, er det slutten på parlamentarismen som styreform, der folket veljer representantar til å avgjere nasjonen sin politikk. Dette er ikkje ein retning samfunnet bør gå i. Skal studentar brenne seg til døde for å få opp stipend-delen på studiefinansiering? Overdose for gratis lærebøker? Drukning for lågare skattar? Front-mot-front for betre vegar i distrikta?

Hoste og doktor

2006-06-21T00:48:00.000+02:00

Etter hetebølgja sat eg att med ein stygg hoste. Han vart heller verre med tida, og i helgja hadde eg skikkeleg bronkitt-hoste som etter lang tid let meg hoste opp store klumpar med grønt slim. Måndag morgon ringde eg til fastlækjaren og fekk time klokka 14.15 same dag. Ikkje noko å sei på det. Før den tid hosta eg opp endå meir guffe, og kjende meg ganske bra då eg kom til senteret. Det skulle eg kanskje ikkje ha gjort. Lækjaren kunne ikkje finne at eg hadde nokon bronkitt-lyd, og blodprøvene (3 i talet) viste heller ikkje nokon inflammasjon.

På tysdag kom hosten like etter eg gjekk på bussen. Eg skræmde sikkert dei som sat der, i alle fall ville eg vore skræmd om eg var i deira stad. Nok ein gong fekk eg omsider hosta opp ein god del klumpar, denne gongen gulgrøne i staden for grøn-brune. Det heldt fram i omlag ein halvtime, til litt etter eg kom på jobb.

No ved midnatt har eg hoste att. Det er typisk ein gong eller to om dagen at det er for alvor, elles er det mest småhoste. Eg kan heller ikkje sove mange timane i strekk, då renn bronkiane fulle og eg vaknar av at eg ikkje får puste. Korleis doktoren kunne oversjå dette er ei gåte for meg, men eg må ha truffe heilt perfekt med timinga og komme nett før det vart verre att. Hadde eg visst han ikkje ville tru meg skulle eg ha samla alle slimklumpane i eit glas og teke med til han... Kanskje dette er det dei kallar "ektoplasma" då?

Hetebølgje

2006-06-17T11:57:00.000+02:00

Det er ikkje sikkert det er varmare her på Sørlandet enn det har vore før om åra. Det kan vere berre at eg for først gong ikkje bur i ein kjellar. Kjellaren her i huset er mykje kaldare enn her oppe der eg bur, men det einaste rommet eg har der nede er vaskerommet. Kanskje eg skulle teke madrassen min ned der... og den bærbare PC'en, men dessverre har eg ikkje fått det trådlause nettverket til å virke under Ubuntu Linux.

Istaden har eg sett inn ei stor vifte på heimekontoret til å kjøle meg av om ettermiddagen. Det virkar for så vidt greitt nok, men eg lurer på om det kan vere grunnen til at eg no har fått ein stygg bronkitthoste. I byrjinga var det tørrhoste, men i det siste har eg hosta opp klumpar av grønbrun guffe. Er ikkje sikker på om det er eit godt eller dårleg teikn. Ingen feber. Kanskje vifta har kvervla opp støv med bakteriar frå dei som budde her før (tidlegare soverom, vegg til vegg teppe). Har no sett inn ein luftrensar.

Eg håpar det snart blir regn att. Eg er ikkje skapt for dette klimaet. Dessutan er sollyset for skarpt til å spele Animal Crossing på bussen...

Piratkopiering og fargekrit

2006-06-06T16:38:00.000+02:00

"Foreldre må betale for barnas tagging. Hvorfor ikke også når de sjeler musikk?" spør Inger Marie Sunde i artikkelen "Fildeling og straff" i Dagens Næringsliv idag, 06-06-06.

Fordi det aller meste av tjuveriet er av same natur som når ungar teiknar med fargekrit på asfalten. Når neste regnbyge er over, er skadeverket borte.

Det platebransjen ikkje har fått med seg, er det som magasinet The Economist kallar "avstandens død". Og det er faktisk ikkje berre avstanden, men til ei viss grad tida, som har fått på pukkelen etter at Internettet kom. Der ein flokk ungdomar før kunne sitje saman om ein platespelar og lytte til dei same platene, kan no ein flokk ungdomar lytte på venene sin musikk over Internettet. For det aller meste er dette plater som dei aldri ville tenkt på å kjøpe, og i mange tilfelle spelar dei den aldri om att. Det er dette eg samanliknar med fargekrit på asfalt.

Sidan eg var ein liten unge på 60-talet har folk hatt evne og vilje til å kopiere musikk. Vi brukte kassettar til det. Det hindra oss ikkje frå å kjøpe musikk når vi fekk råd til det, og Internettet har heller ikkje fått slutt på platesalet. Berre i det aller siste har det vore ein nedgang. Det er vanskeleg å sei om dette skuldast mangel på god musikk eller det faktum at plateselskapa går ut offentleg og skrik ut sitt hat mot kundane sine.

Når representantar for plateselskapa (og deira betalte handlangarar) framstiller det som eit økonomisk tap når vener lytter til kvarandre sin musikk, er det to forklaringar: A) Dei lyg for pengar og håpar at ingen merkar det, B) dei er gale i hovudet og treng psykiatrisk hjelp.

Eg heller til B, for eg har sett det same på andre område i livet: Når folk blir heilt isolert frå den verkelege verda av "ja-menn" som nikkar og smiler til alt dei seier, går det på forstanden laus. Det renn meg i hug eit sitat frå ei av dei Apokryfiske Bøker: "Gråt over den døde, for lampa hans er slokna. Men gråt meir over dåren, for forstanden hans er slokna."

Alvedans?

2006-05-20T20:47:00.000+02:00

Eg likar svært godt den norske songen i Eurosong festivalen / Melodi Grand Prix. Bortsett frå ein ting: Teksten. Den forferdelege, skammeleg patetiske teksten. Eg skulle ønskje dei hadde skrive han på samisk så ikkje eg forsto kva dei sa. Eller endå betre, Quenya (alvemålet til Tolkien).

Straumbrot

2006-05-17T18:42:00.000+02:00

Idag har straumen kome og gått fleire gonger. Det er ganske irriterande sidan alle datamaskinene mine går ned. Eg kunne brukt den bærbare, som har batteri, men rutaren og ADSL modemet går på lysnettet óg. Og uansett er det ikkje stort den gamle bærbare kan brukast til.

Av anna nytt kan nemnast Google Notebook. Ja vi elskar Google litegrann.

Første vitjing frå brannvesenet

2006-05-15T14:06:00.000+02:00

Til alt hell var dette ein førebyggjande inspeksjon, ikkje ei utrykking! Denne karen, som óg arbeider som feiar her, var både nede i kjellaren og inn på soverommet for å inspisere pipa. Han fortalde meg at ved ein pipebrann kan det bli 1000 grader, ikkje berre øvst men heile vegen ned, og pipa kan slå sprekker. Då er det ikkje lurt å ha strietapet på.

Det undrar meg at dei kan kome på dette no etter at huset har stått sidan 1968. Men det er vel heller slik at i den tida tok ein ting meir som dei kom. "Sett slikt, der brann huset ned. Jaja, det var vel ein Herrens vilje med det." I våre dagar, derimot, er det knapt nok akseptabelt å døy av alderdom eingong. Og når sant skal seiast, likar eg sjølv den nye tankegangen betre.

Idag haltar eg

2006-05-14T21:08:00.000+02:00

Merka eigentleg ikkje stort før eg skulle gå ein tur i kveld. Då eg byrja gå, såg eg at eg halta stygt. Det gjer ikkje særleg vondt, men høgre foten peikar eit stykke ut til sida, og dersom eg prøver å vende den rett fram, gjer det vondt i hofta. Ingen ide om kvatid og korleis det vart slik, men det var ikkje slik i går. Vonar det ikkje vert slik i morgon heller. Merkeleg.

Elles har eg temmeleg gode dagar her. Den voldsomme varmen sist veke har langt på veg gitt seg, så det er meir komfortabelt no.

Ikkje noko å sjå her

2006-05-09T00:57:00.000+02:00

Har vore litt småsjuk siste par dagane, nok til å ikkje drive kroppsøving, men ikkje verre enn at eg var på jobb ~~idag~~ måndag 5-6 timar. Elles spelar eg Oblivion, men det er på engelsk. Har kjøpt eitpar e-bøker, men dei er og på engelsk. Det er i grunnen berre jobben min som ikkje er på engelsk no om dagane, og den har eg lova dei å ikkje skrive om.

Første skikkelege sommardagen

2006-05-04T13:24:00.000+02:00

Første dagen på eit halvt års tid at det slett ikkje trengst jakke utandørs, sjøl ikkje i skuggen.

Så er det og fødselsdagen til broren min, sjøl om han ikkje vil vedgå det. (Han brukte å sei at han var fødd 31. april...) Eg feirar ikkje årmålsdagar og jul og denslags; det er for ungar. Men han er 50 nett no, så han kan nok ikkje unngå å leggje merke til det.

Når dagane blir lange

2006-04-30T23:02:00.000+02:00

Idag såg eg på klokka og var forundra at den var godt over sju. Det var fullt dagslys ute, endå det var overskya. Eg tok ein spasertur, ikkje så overvettes lang, mest for å minne kroppen om at det bur folk i han enno. Framleis dagslys når eg kom heim. Det er jo ikkje så løye, for om nokre få timar er det mai. Snart vil natta slutte å eksistere i friluft, berre i fangenskap bak tunge gardiner.

Men varmen har ikkje sett inn enno. Og for meg kan det godt vente. Sjøl om mennesket er defintert som ein tropisk art, så likar eg sjøl vår og haust best.

"Nortura"??

2006-04-25T11:18:00.000+02:00

Gilde og Prior skal visstnok slå seg saman, og namnet blir "Nortura" les eg. Kva skal det bety? "Norsk Tortur Av dyra?" Eit meir høveleg namn ville vere "Norges Kjøttmonopol" eller berre "Kjøttmonopolet". Det står i ein solid norsk tradisjon.

Skikkeleg vårdag!

2006-04-22T17:40:00.000+02:00

Eg gjekk ut på tur i jakke og vintercaps. Kom heim i skjorta.

Eit anna sikkert vårteikn er at heile Nodeland luktar møkk, fordi ein eller annan bonde har funne ut at dette er beste dagen å køyre ut gjødsla. Eg får prøve å ete opp iskremen (berre 5% feitt!!) før lukta sivar inn gjennom luftespaltene i huset. Yogurt-is med karamell og sjokolade smakar så mykje betre enn yogurt-is med karamell, sjokolade og drit.

Vel, det er sant. Sjøl for ein bondegut.

God påske

2006-04-18T00:12:00.000+02:00

Alt står vel til, bortsett frå at eg har vondt i armen etter å ha spela Oblivion til langt på natt. (Eg kunne sei eindel om Oblivion, men spelet er på engelsk og dersom du kunne lese engelsk ville du truleg lese The Chaos Node i staden for Kaosnodeland.

Foten var fin att etter nokre få dagar. Huseigaren spelar musikk i kjellaren men mi leggetid er endå seinare enn hans så det er null problem.

Datamaskinvarehuset

2006-04-08T09:19:00.000+02:00

Den nye PC'en (nettverksnamn "ITL-06", vil truleg bli entra til "OBLIVION") har patcha opp City of Heroes medan eg sov i natt. Det er gladnytt, sidan då eg gjekk til sengs sa den at det enno var 17 timar att. Eg var ikkje forundra over det, sidan eg oppdaterer over trådlaust nettverk og sidan det har kome 6 store "tilleggspakkar" over Internett sidan spelet kom ut for snart to år sidan. Når det gjeld gratis nytt innhald er det ingen over NCSoft. Eigarar av andre spel må kjøpe slike pakkar i butikken.

Når den nye maskina er fullt oppdatert skal den kome i staden for tre av dei gamle. Ja, eg har meir enn tre maskiner i huset. Det er 4 maskiner i nettverket no: ITL-06 er det nye råskinnet frå North Corporation. NVIDIA (også kalla "Soverom") er frå 2005 og dagens spel-maskin. ITL2004 er som namnet seier frå 2004, men er allereie i ferd med å bryte saman. CD/DVD stasjonen er daud og vifta slurar somme dagar så ille at eg ventar å kjenne røyklukta. Den kan óg berre spele City of Heroes litt hakkete. MAGNUS er ei bærbar maskin frå ifjor eller forfjor, den har no Ubuntu Linux og blir brukt til fildeling sidan Linux er immun mot virus og ormar. Denne jobben skal etterkvart gå til LINUS, ei nyare Linux-maskin som idag står på jobben. Så er det VRIMOEN, den eldste Windows XP maskina i huset. Vifta der er nesten heilt gåen (røyklukt) og den kan ikkje køyre moderne spel. Namnet kjem frå min første store Sims2 familie. Tilsist er det WINME, som altså køyrer Windows Millennium Edition. CD-spelaren virkar ikkje på den heller, elles går den som ei klokke. Eg har mykje e-post på den frå gamalt av som eg kopierte over frå ei endå eldre maskin, dette må over på ITL-06 før eg leverer den inn til resirkulering. I tillegg til desse 6 maskinene har eg ei på jobben som eg har tenkt å la bli der.

Kanskje eg kjem til å skrive litt mindre krasst om andre folk sin materialisme til dess eg får kvitta meg med somme av desse maskinene? Men i det minste kan nye maskiner gjere ting dei gamle maskinene ikkje kunne. Prøv å forklare meg kva du kan gjere i ein ny sofa som du ikkje kunne i den gamle.

Arme arm

2006-04-07T10:42:00.000+02:00

Høgre armen min er stiv og gjer vondt att. Fram til no har dette året vore det beste på lenge i så måte. Eg skuldar litt på Oblivion (særleg på den gamle maskina og utan styrespak), litt på skriving på jobb og no siste veka at eg ikkje har kunna gå tur på grunn av flis i foten. (Eg går på jobb no, men er ikkje motivert for lange fot-turar etterpå så lenge det enno gjer vondt. Eg kan sjå noko svart der inne, sjøl om eg ikkje har nokon ide om korleis det kan ha kome seg inn der.) Jamnleg kroppsøving er viktig for at blodet skal strøyme gjennom alle stader i kroppen, også samanknytte musklar.

Paracet smakar grufullt, forresten.

Når eg vert aldri så lite nedstemt, muntrar det meg alltid opp å lytte til Knutsen's song "Ingen er glad i meg" eller Jonas Groth med "Why am I always alone for Christmas". Hmm, finst det i det heile eit nynorsk ord for selvmedlidenhet? Sjølvmedynk? Eg kan ikkje sei eg har høyrt eller sett det nokonstad. Kanhende ekte nynordmenn er immune mot slikt.

Ny PC her

2006-04-05T22:15:00.000+02:00

Faktisk henta eg han igår. Idag gjekk den første delen sund, men heldigvis var det berre framdekselet føre DVD-stasjonen. Eg hadde sett inn CD-en med Oblivion igår. Spelet går som smurt med rimeleg høg grafikk på denne maskina, og med Thrustmaster spelkontroll istaden for mus for det aller meste er det ikkje så ille på handleden. Nok om det, eg fekk ikkje ut att CD'en så eg kunne installere andre program. Den rørte på seg, stanga i dekselet, ga opp og starta Oblivion istaden. Først då eg pirka laus dekselet (som så fall ned langs innsida av fronten og aldri vart sett meir) kunne eg få ut CD'en.

Maskina står i stova til så lenge, knytt til heimenettverket trådlaust. Det er seinare enn med kabel, men rikeleg fort nok. Eg skriv dette på den no, berre fordi eg kan. Eg har allereie kopiert over heile "Mine dokumenter" katalogen med underkatalogar frå maskina som skal fasast ut. Det neste problemet er at eg har så mykje gamal e-post i Opera på gamle-maskina som eg ikkje veit korleis eg skal få tilgang til sjøl om eg kopierer det over. Like eins det engelske dikterings-programmet som let meg snakke til maskina, det må truleg trenast heilt på nytt på den nye maskina. I alle fall måtte det trenast på nytt på den gamle då eg stilte maskina attende to månader etter nettverkstrøbbelet i vinter.

Lastar no ned OpenOffice.org i bakgrunnen, men vil truleg gå over til å skrive i Writely (no ein del av Google-familien) når Writely vert opna for nye brukarar att. (Det har vore i beta fram til no men skal snart flyttast til Google sine servarar.)

Mikrodommedag

2006-04-05T19:13:00.000+02:00

Huseigaren er komen heim frå universitetet. Eg har ikkje møtt han, men ser at garasjen er spadd ut. Sant å sei tenkte eg ikkje på det, særleg sidan det allereie sto ein bil utanfor i snøen. Vel vel. Eg går ut frå at han vil inspisere huset. Skal bli spanande å sjå kva han seier. Eg har berre kontrakt her ut juni, og dersom han er av same klasse som han i Kvernstien så blir det nok ikkje noko meir enn det. Heimekontoret især er ganske rotete, ettersom eg ikkje har pakka opp ting eg ikkje treng enno.

Fotverk

2006-04-03T14:19:00.000+02:00

Idag held eg meg heime frå jobben på grunn av verk i høgre foten. Eg vakna med det til morgonen, og det var såpass at eg ynka meg for å dra på meg ein sokk. Ikkje bra å gå rundt med heile arbeidsdagen.

Vel, hadde det vore noko kronisk, hadde eg gjort det likevel. Men det eg håpar er sjølsagt at det skal gå over dersom eg ikkje går på foten eller tek på meg sko. Det er ei eller anna form for verk (betennelse). Eg har vondt for å tru at det er ei flis, sidan eg ikkje gjekk på anna enn teppe igår, ein av dei få dagane eg ikkje har gått ut i det heile. Men der er ein lilla flekk nett der det er som vondast, så eitkvart er det. Kjøtetande bakteriar? Den som lever får skrive meir.

Vår-dagar

2006-04-01T11:35:00.000+02:00

Det har vore mildt det meste av denne veka. Først var det regn annakvar dag, men igår var det strålande vårsol, brånande snø, alt det der vi hugsar frå då vi var små. Det er litt overskya idag, men framleis sol for det meste. På tide å ta ein spasertur opp på heia att.

Sidan eg flytte hit har eg blitt gradvis feitare. Eg har enno langt att til før eg vart sjuk i fjor, men eg har lagt på meg nær 3 kilo på desse 2 månadene. Så det skulle ikkje skade å kome ut litt meir i frisk luft. Må hugse å ta med MP3 spelaren, sidan det ikkje er god folkeskikk å synge utandørs i tettbygde strok.

Eg er ein dum forbrukar

2006-03-30T23:03:00.000+02:00

Gratulerer Coop! De klarte å lure meg. Håpar de set pris på litt gratis reklame som takk.

Såg denne literen med juice på Prix. Det var bilete av fullt av blåbær på framsida og tekst: Blåbær & Aronia. Med litt mindre skrift under: Solbær, og nederst: Eple. Først når eg kom heim og opna pakken las eg med lita skrift på sida: Eple 74%.

Jaha.

Så alle de som har venta på ein eplejuice med ein liten smak av blåbær, no veit de kvar de kan få kjøpt det.

(Dataspel:) Ståljustis i Heltebyen

2006-03-29T11:30:00.000+02:00

Litt gladnytt etter sutringa: I går kveld var eg på nettet og spela City of Heroes, då eg såg nokon som averterte for ei supergruppe. Det er ikkje heilt uvanleg. Det uvanlege var at dei reklamerte med å vere i koalisjon med Steel Justice... den supergruppa eg høyrde til før eg mot min vilje vart utestengd frå Internet i to månader! Då eg kom att hadde eg ikkje sett nokon av dei, og nettsida deira var stengd for meg, så eg tenkte gruppa var oppløyst. Det var ho altså ikkje. Så no er eg eit koalisjons-medlem att. Sjølve Steel Justice har ei kick-tid på 3 dagar... dersom du ikkje har spela helten din på 3 dagar blir du sparka ut. Men denne andre gruppa har 20 dagar, for dei mindre aktive. Før jul hadde eg ingen vanskar med å spele kvar tredje dag, eller nesten kvar dag, men eg har jo endra litt her og der i livet mitt på desse månadene så det er kanskje like greitt med litt slakkare krav.

Eg er ikkje ein veldig sosial person, for å sei det mildt, men det er greitt å kunne spele regelmessig saman med folk eg veit ikkje er idiotar. Steel Justice er full av erfarne spelarar som er vane med å arbeide saman. Eg er litt meir usikker på denne koalisjons-gruppa... kven er t.d. "CreepyMan"?? Vel, ein skal ikkje sjå hunden på håra før bjørnen er skoten. Elles er det alltid lett for ein Forsvarar å kome med i ei gruppe, det er berre å svara ja når dei spør "can u heal?". Men slike grupper er ofte ikkje bryet verd. Eg vil heller spele litt oftare i godt selskap... sjøl om kvar tredje dag kan vere i meste laget no.

Småkvalm

2006-03-29T09:58:00.000+02:00

Sidan i går før nons (eller heiter det lunsj på nynorsk no?) har eg vore småsjuk i magen. Ikkje nett kvalm, men nesten, berre ikkje nok til å kunne kaste opp. Det gjer ikkje eigentleg vondt, berre nesten. Det er som ein tung klump nederst i magen, og det er meir forstyrrande enn det høyrest ut til. Kanskje ikkje minst fordi det minner meg om ifjor på denne tida. I to veker då var eg kvalm utan å kunne kaste opp, og hadde ofte kramper eller spasmer i tjukktarmen, som eg óg fekk igår. I tillegg hadde eg turar av frysningar same kor varmt det var i rommet... det har eg ikkje no, bank i bordet. Etter eg slutta å ete feitt vart desse symptoma borte, men eg miste også nær 15% av kroppsvekta over dei neste 8-9 månadene.

Dei siste to månadene har eg lagt på meg att meir enn to kilo. Eg et framleis ikkje synleg feitt og ting eg veit er fulle av feitt, men over tid har kroppen tilpassa seg så eg har kunna ete meir og meir. Då dette starta for eit år sidan, kunne eg berre ete to koppar med melkemat til frukost, no kan eg lett ete dobbelt så mykje, og eg blir fortare svolten att. Det kan vere at sidan det er litt feitt i vanleg mat, at eg er byrja å få i meg meir feitt enn eg toler att. Det ser ut til å vere den totale mengda av feitt som slær ut, ikkje kor konsentrert det er eller om det er "sunt" eller "usunt" feitt.

Eg må nesten gje dette litt tid og sjå korleis det utviklar seg. Men det blir i alle fall til at eg heilt naturleg et mindre når eg er slik, så om det er det så skulle det gå over av seg sjøl.

Tid for ny PC

2006-03-28T20:09:00.000+02:00

Idag tinga eg ein ny spel-PC frå North Corporation. Ja, eg veit eg sa "ingen ny PC før all gjelda er betalt" men det var medan eg enno kunne spele alle spela mine på den forrige. På fredag kjøpte eg Oblivion, men fann fort ut at det nok var laga for ein nyare generasjon av maskiner. Eg måtte skru ned grafikken til nær minstemålet for å kunne flytte markøren rundt på skjermen rimeleg jamnt og fort, for ikkje å snakke om gå omkring eller slå ihel dyr. Sjøl då går det i sirup dersom eg kjem uti ei eng full av blomar, eller i deler av hovudstaden.

Eg byrjar å kome nær grensa for kor stor familie eg kan spele i Sims2, óg. Er 12 no men Malvin går i tankar om ei veninne frå universitetet, og Marius og Tosha prøver framleis på baby nummer 8. I bryllaupet til Martin var dei rundt 20 med gjester, og stort meir enn det kan dei ikkje vere før det går i krabbegir. Det er med 2.93GHz og GeForce 5500.

Den nye maskina blir på 3.4 GHz med GeForce 6600, som er neste generasjon skjermkort (for PCI express buss). Det er slett ikkje det nyaste av skjermkort, dei verkelege spel-fantastane er visstnok oppe i 7600 no. Men det er eit stygt prishopp opp til GeForce 7 serien, og det er vanlegvis 3-4 år mellom kvart spel frå Bethesda (og Maxis) så eg trur heller eg ventar. 6600 er på lista over kort som er støtta i Oblivion; 5500 er ikkje.

Dessutan er CD-stasjonen gåen på skrive-PCen, og vifta bråkar no så mykje til tider at eg ikkje kan diktere men må skrive for hand jamvel på engelsk. Så det er snart tida til å pensjonere denne og gjere om spelmaskina idag til ny skrivemaskin. Om eg då ikkje flytter Dragon NaturallySpeaking rett til den nyaste maskina: Den ekstra prosessorkrafta kunne kome vel med, Dragon klarar ikkje å halde tritt med meg idag når eg først veit kva eg skal sei. Og den nye maskina kjem med ei særleg stillegåande vifte, var avtalen.

I anna PC-nytt ser det ut til at eg snart er ferdig med å låne ut Linux-servaren til jobben, så eg kan ha den til anime-servar heime heller enn den bærbare. Den bærbare blir svært varm av slik ein jobb, og har lite diskplass.

Meta: Skuffande

2006-03-28T01:46:00.000+02:00

Eg er kanskje bortskjemd frå LiveJournal, men eg hadde trudd eg ville blitt varsla i epost når nokon kommenterte på bloggen min.

[Endring] Dette viser seg ved nærare ettersyn å vere mogleg, eg må berre skrive inn epost-adressa mi ein stad til, det held ikkje med den oppføringa eg ga når eg oppretta bloggen. Så no kan de kommentere utan å få ei "kald skulder"! Jaaa!

Det, og det burde vere råd å kommentere kommentarar.

Men i det minste er blogger-bloggane fine å sjå på sjøl utan å leggje arbeid i dei. Det er då noko.

Drivhuseffekt eller Guds vreide?

2006-03-26T12:37:00.000+02:00

Snøen fell så lett og kvit... idag, 26. mars, som så ofte før denne "våren". Dette er ikkje eit triksefoto: Det er ein svært verkeleg bil som er snødd ned med lag på lag av snø. Fordi eine sida står inn under eit halvtak, kan du sjå bilen; elles hadde det berre vore ein liten haug i snøhavet, knapt så du ville lagt merke til det. Dette er på kysten av Sørlandet, ikkje djupt inne i dei norsk-okkuperte territoria i Sameland.

I dei seinare åra har vi høyrt meir og meir om drivhuseffekten. Og her for nokre år sidan las eg i Scientific American at den store varme-utvekslinga mellom hav og luft utanfor Island kanskje kunne stogge på grunn av drivhuseffekten. No sist haust var det somme forskarar som hadde vore ute i havet og målt at denne utvekslinga var halvert på dei siste ti åra.

I mellomtida har eg sett tørkekatastrofer over heile verda bli skulda på drivhuseffekten, og ørkenspreiinga sør for Sahara (som sidan har snudd, utan at folk likar å snakke om det). Eg har sett storflaumar både i utlandet og her til lands bli omtala som eit resultat av drivhuseffekten. Orkanar og andre stormar er sjølsagt drivhuseffekten si skuld, og stormflod slik som den som tok New Orleans nyleg. Jamvel spreiing av tropiske sjukdomar til nye område er drivhuseffekten si skuld.

For ein som er van med pietistisk kristendom, er det slåande kor likt dette er skildringa av Guds harme. Anten det er for varmt eller for kaldt så er grunnen den same. Anten det er tørke eller flaum, så er grunnen den same. Alle ulukker er vår eiga skuld, fordi vi har levt som vi ville og forlete det liv Dei Gamle levde. Det kan ikkje bli noko betre før vi vender om og sluttar å leve i luksus, og jamvel då vil nok vreiden henge over oss og våre born like til tridje og fjorde leden.

I grenselandet mellom tru og vitskap har vi uttrykket "ikkje-falsifiserbar teori", ein teori som du kan sei er sann uansett kva som hender. Til dømes at den usynlege rosa einhjørningen skapte jorda sist onsdag, komplett med fossilar og alle folka med deira minne i hjernen. Sjøl om vi tydleg minnest at vi var i live for ein månad sidan, så viser det berre kor godt handverk den usynlege rosa einhjørningen gjorde då han skapte minna våre.

Vitskapsmenn held seg godt unna ikkje-falsifiserbare teoriar, for det meste. Som venteleg kan vere, sidan det ikkje er bruk for vitskap når vi har ein teori som kan forklare alt, jamvel heilt motsette hendingar.

Så, er den kaldaste mars på over 40 år eit resultat av menneske-skapt drivhuseffekt eller ikkje? Nesten heilt sikkert ikkje. Naturen er ikkje så glup at han sjekkar om ting er menneske-skapte eller ikkje. Og det var varmare enn no i bronsealderen, for ikkje å sei yngre steinalder. Då bada flodhestane i Seinen, elva som renn gjennom Paris. Villsvin grynta i dei varmekjære skogane i Skandinavia. Og Sahara var ei grøn eng der antilopene beita. Det vil ta mange år med statsstøtta gasskraftverk før vi kjem så langt.

Dersom snøen ikkje er gått til midtsomars, skal eg revidere mitt syn på denne saka.

På eventyr i frysedisken

2006-03-25T19:44:00.001+01:00

Idag lever eg fårleg. Eg kjøpte med meg heim ein djupfrosen middag og åt ein god del av han, steikt i panne slik det sto på pakken, berre lenger.

Det er meir enn 20 år sidan sist eg kjøpte ein slik djupfrosen pakke. Kanskje nærare 25. Det var ei grønsakblanding - tru om ikkje ho heitte "Amerikansk Grønnsakblanding"? Der var små terningar av gulrot, og grøne erter, trur eg. Kanhende blomkål. I alle fall smakte det godt, søtare enn eg hugsa heimanfrå at kokte grønsaker brukte smake. Den natta vart eg så sjuk som sjeldan før eller sidan. Etter det har eg halde meg unna grønsaker, for ikkje å nemne kjøt og fisk, frå frysedisken. Det hjelper ikkje nett at butikkane (her på Sørlandet i det minste) held godt over dei 18 kuldegradene ein djupfrysar skal ha. Ein må nesten vere glad til at der er kuldegrader i det heile.

Difor altså er dagen idag ein sjøl-laga merkjedag. Etter å ha merka meg at folk har kjøpt fryservarer i alle desse åra utan at folketalet har gått drastisk ned, våga eg meg på ein pose med penne (røyrpasta), små kjøtbollar, baby gulrøter og brokkoli. Eg tok vekk brokkolien før eg varma maten; den smakar allereie død og forderv, så med den i kunne eg ikkje merke om maten var etande eller ikkje. Vel, den smakte ikkje så ille. Mine eigne heimelaga pasta-panner er langt betre og tek ikkje allverda tid å lage dei heller, kanskje 10 minutt lenger. Og prisen var fem gonger høgare, vil eg tru. Vel, kanhende berre fire. Men det var ikkje for smaken si skuld eller prisen eg kjøpte det, men for vitskapen. No er det berre å vente på natta og sjå om eg vert frykteleg sjuk att. Dersom eg aldri skriv meir på desse sidene, kan du gå ut frå at eksperimentet var mislukka...

Sosialisme som nostalgi

2006-03-25T15:17:00.000+01:00

På larudagsturen min gjekk eg forbi samyrkjelaget (Prix no kalla) og der heldt dei på å setje opp ein stand for Arbeidarpartiet, såg det ut for. Eg tenkte over at sosialismen er ein tanke som tida har gått frå; så kvifor har vi ei sosialdemokratisk regjering og jamvel med ekte sosialistar i? Nostalgi, tenkte eg med meg sjøl.

I industrisamfunnet hadde vi bonderomantikken. Folk hadde flytta frå landsbygda til byar eller bygdebyar der dei jobba i fabrikken. Men dei - eller borna deira - drøymde om livet på landsbygda der dei kunne klappe kalvar og bunadskledde budeier. Det var ikkje det harde livet fedrene deira hadde levt dei ville attende til, men ein draum der alt det mørke og grå var borte.

No er det ei ny tid, informasjonsalderen, der folk har arbeidskapitalen sin i hovudet. Og dei som ikkje har slikt, fell utanfor og heile vegen ned til botnen. Så no drøymer folk om det gode gamle industrisamfunnet der alle var like, Just Another Brick in the Wall. Men dei vil ikkje ha det på alvor. Dersom dagens "sosialistar" prøvde å gje oss att den gamle tida, med NRK-monopol, 80% marginalskatt og reglar for kva bankane kunne låne ut pengar til... dei ville falle under sperregrensa ved neste val. Det er berre ein draum om ei tid som aldri var.

Laurdag

2006-03-25T13:46:00.000+01:00

Vel, pulsen min er attende til normalt (rundt 80 ståande på stovegolvet, mot 105 sist helg då eg hadde verk i overkjeven). Så den svake hovudpina kjem truleg ikkje frå ein infeksjon denne gongen. På tide å ta ein times spasertur, slik eg brukar å gjere på laurdagar. I Søgne var butikken omlag så langt unna at det høvde, her er butikkane så mykje nærare at eg ikkje har det å skulde på. Så det blir til at eg berre går for å gå, endå så mykje det byr meg imot. Men kroppen treng å haldast vedlike når ein nærmar seg 50. I denne alderen hadde mor mi allereie høgt blodtrykk og byrjande sukkersjuke, etter det eg minnest. Far min fekk sukkersjuka seinare, men det er litt i seinaste laget når du står der med diagnosen i handa.

Sjølsagt kan det hende eg kjem under ein lastebil, og all gåinga har vore til inga nytte. "Et sunt, tren regelmessig, døy likevel." Så berre for å vere på den sikre sida har eg tenkt å nyte turen. Eg tek med meg fotoapparatet og min Sony Network Walkman (det er deira Sonyspråk for MP3 spelar).

Ja ne, minna-san!

El-avgifta

2006-03-24T15:06:00.000+01:00

Det er vanskeleg å forestille seg ein skatt som slær meir kaotisk ut enn el-avgifta. Tanken var kanhende at dei rike brukar meir straum, sidan dei har større hus. Vel, dei fattige har gamle og dårleg isolerte hus, så dei brukar meir straum dei og. Og kvatid vart folk på Lesja og Lom rikare enn folk i Stavanger eller Kristiansand? Er dei som har sytt for å byggje i ly for nordavinden fattigare enn dei som av nokon grunn får han hylande rundt husnovene heile vinteren igjennom?

Så kanhende tanken slett ikkje er å skatte dei rike, men å få folk til å byggje betre isolerte hus eller etter-isolere dei gamle. Det er ein vakker tanke. Men skulle dei ikkje allereie ha grunn til å gjere det? Sjøl med berre vanleg moms - eller jamvel utan - vil straum uansett koste pengar, så isolering vil framleis vere ein god ide. Kanhende ikkje så god ein ide som no. Men kvifor skal staten spesielt blande seg inn i nett dette? Kvifor ikkje leggje ei tung avgift på brød så folk sluttar å kaste skalkar og halvgamalt brød i søpla? "Gudsfrygt med nøisomhed er en stor vinding!" Det synest merkeleg at dette berre skal gjelde for straum og ikkje andre ting som høyrer dagleglivet til. Og kven som helst kan ete halvgamalt brød; men ikkje alle har råd til å byggje om huset sitt. Ja, ikkje alle eig huset dei bur i eingong, sjøl om dei fleste rettnok gjer det.

Nei, el-avgifta er nok ikkje noko meir enn ein farkestrek for å lure skattepengar ut bakvegen der folk ikkje ser. Så klagar folk på e-verket eller tenkjer det er deira eiga skuld, medan staten syg seg feit og dryg. Som han vel må gjere; gje keisaren det som høyrer keisaren til, seier eg. Men lyg ikkje om det. Gjer ikkje ting bak ryggen på folk.

Pensjonssparing?

2006-03-23T13:29:00.000+01:00

Så på veg til tannlækjaren idag går eg forbi ~~DnC~~ ~~DnB~~ DnBNor, og ser i forbifarten ein plakat som preikar den gode bodskapen om pensjonssparing, fordi du treng det. Og eg tenkjer med meg sjøl...

Først betalar vi altså over skattesetelen pensjonane for besteforeldra våre, så for foreldra våre. Skulle vi level lenge nok til å nå pensjonsalderen, så er visstnok skattekista tom, så innan den tid bør vi ha spart opp vår eigen pensjon heilt privat. Skal det vere noko meir før vi stengjer? Kanskje vi også skulle spare opp så neste generasjon kan få sin pensjon óg. Du veit aldri om dei klarar å leggje noko til side. Trass alt klarte ikkje dei to førre generasjonane det, tydelegvis, sidan vi må betale for dei...

I røynda er det sjølsagt ikkje så enkelt (med mindre du er medlem av FrP, kanhende; som Skrifta gløymde å sei: Alt er enkelt for dei enkle). Det heile starta på eit vis seint på 60-talet med innføringa av folketrygda. Då brått vart det gjeve pensjon til folk som ikkje hadde betalt pensjonsavgift sjølv, dei som då var 70 år eller meir. Men det er ikkje som om vi till dess hadde sett dei gamle ut i skogen til ulvane. På bygda vart dei "kårfolk", og hadde rett til å bu i huset og ete av maten til sin døyande dag. Det var sikkert liknande ting i byane, men eg var ikkje i byane på den tida.

Saka er at frå Neandertalarane sine dagar har det alltid vore slik, at dei gamle vart forsørgde av dei unge. Kvifor skal det brått kome til ein slutt nett med vår generasjon? Det er det eg lurer på. Dei små rakkarane kan godt betale litt skatt for å halde oss i live når vi byrjar gå i barndomen. Sjøl om det kanskje ville vere like lurt å gje oss ei sprøyte så vi somnar stille inn, heller enn å la oss morkne vekk utan minne om kven vi var og kva vi gjorde her i verda. Men det er ei anna soge.

Dagens anime

2006-03-22T19:08:00.000+01:00

Medan eg først sov og sidan var på jobb, har linux-maskina mi i det stille lasta ned dei tre første episodane av Shinigami no Ballad, ein japansk teiknefilmserie om ei dødsgudinne og jobben hennar. "Hjartevarmande" seier dei som har lese romanane på japansk. Filmane er teksta til engelsk av Triad. Ikkje for kommersielt bruk.

Etter å ha sett første episode vil eg sei at dette er ikkje ein "13 på dusinet" anime. Handlinga er enkel, nærast banal. Men den er ulik den lettbeinte underhaldninga du oftast finn, også i Japan. Den er korkje komisk eller erotisk, kanskje dramatisk - døden er vel så dramatisk eit tema som du kan finne - men først og framst sentimental, stille og vakker. Som dødsgudinna seier til slutning: "Dei døde kan ikkje gråte... så eg gret for dei."

Filmen er lite eigna for "anime maraton" men heller til å sjå før ei tid med stille ettertanke.

Kaosnodeland??

2006-03-22T18:59:00.000+01:00

Sidan 1998 har eg skrive ei dagleg nettdagbok på engelsk, kalla The Chaos Node. På den tid eg byrja skrive, var Internett enno noko nymotens for spesielt interesserte her i landet, så det var ikkje naturleg for meg å skrive på norsk. Dessutan hare eg eindel smale interesser, så det var naturleg å gå ut til eit breiare publikum. Men no når alle og bestefaren deira har Internet, kan det hende det er bryet verd å skrive nokre ord på norsk. Sjøl om mange nordmenn idag les engelsk, tek det ofte lenger tid og det kan vere nyansar som går tapt dersom du ikkje jobbar med det språket til dagleg.

Namnet på bloggen her speglar ikkje berre namnet på hovudsida mi, men og det faktum at eg bur på Nodeland, ein tettstad utanfor Kristiansand. Den kombinasjonen var rett og slett for god til å gå forbi. Så, KaosNodeland!

Når det gjeld målforma... vel, eg vaks opp midt i Ny-Noreg, ikkje langt frå fødestaden til Jakob Sande. Men det er og ein fin IQ-test for storparten av folket. Sidan nynorsk har ein vanskelegare gramatikk og er mindre brukt, må du ha litt IQ eller ha lese eindel litteratur for å skjøne det like lett som det enklare bokmålet. Har du ikkje slike åndsevner og slik erfaring, er det lite truleg at du kan forstå eit menneske som tenkjer heilt annleis enn du. Og eg er slikt eit menneske. Det er betre at du gir opp no, enn at du får i deg tankar som er for store for deg, slik at hovudet ditt eksploderer og blod og hjernemasse sprutar utover golvteppet. Ingen av oss er tent med ei slik utvikling! Så, nynorsk. Fordi det er trygt!